АЛЕКСАНДР ГАРМАЕВ: УДААДАХИ “АЛТАРГАНАДА” ЗААЛ ҺАА ТҮРЭЛ ХЭЛЭЕЭ МЭДЭДЭГ БОЛОХОБ

Заха холын Захаамин нютагһаа уг гарбалтай Александр Гармаевай одон мүн лэ захагүй Монголой талын Хэнтэйн аймагай Дадал һомондо яларба гээшэ. Бүгэдэ буряадуудые ниилүүлһэн «Алтаргана-2014» фестивалиин гэрэл зурагай мүрысөөндэ тэрэ мүнгэн медальда хүртэһэн байна.

Александрай бүхы наһаниинь хото гоородуудаар нягта харилсаа холбоотой. Тиимэһээ тэрэ һайнаар түрэл хэлэеэ мэдэдэгүй юм. Буряадай гүрэнэй университедтэ һурахадаа, буряад хэлэеэ шудалха хэрэгтэй гэжэ ойлгоһон байна. Харин дээдэ һургуули дүүргэмсээрээ тэрэ сэрэгэй албанда хэдэн жэл соо ябашоо һэн. Россин олон тоото баруун хотонуудта залуу хүбүүндэ хэлыень хэн үзүүлхэб даа, үлүү сагшье байгаагүй.

Оройдоошье хоёр жэл саада тээ, Александр баруун нютагуудһаа одоошье Буряадта бусаба. Абаһаар лэ тэрэ өөрын дуратай фотозурагуудар һонирхожо эхилээ. Тииһээр байтараа түрүүшын фотоаппарат абтаа. Бэрхэ фотограф ургажа ябаһан хүбүүе, «Информ Полис» гэһэн сонин урижа, ажалдаа абаа.

— Үнгэрһэн хабар, намай «Алтаргана» нааданай фотографуудай мүрысөөндэ хабаадаха тухай дурадхал оруулхадань, залд гээд абааб. Хэдэн үдэрсөө өөрынгөө гоё фотозурагуудые бэдэрхэдэмни, оройдоошье олдоогүй. Аза талаангүй, юушье шадахагүй хүнби гэжэ байхадамни хоёрхон лэ зурагууд өөртэмни һайшагдаа, — гээд Александр хөөрэнэ.

Эгээл тэрэ хоёр зурагуудаа эльгээхэ баатай болоһон Александр Гармаев оройдоошье шанда хүртэхэб гэжэ һанаашьегүй ябаа хаш.

Аяар холын харгы гаталжа, одоошье Дадал һомон хүрэмсөөрөө, залуу бэлигтэй хүбүүн абаһаар лэ бусад хабаадагшадай ажалнуудые харахаяа ошоо һэн.

— Эндэшни олон һайн һонирхолтой ажалнууд дурадхагданхай, аза талаантай олон фотографууд тус мүрысөөндэ хабаадана гээшэ. Харин тэдээниие хараад, нэгэ зааха сэгнээд байхадаа, би эндэһээ медальгүй гэртээ бусахагүйб, — гэжэ нюур шарайниинь яларһан Александр маанадта ерээд хэлээ һэн.

Мүнгэн медальда хүртэхэдөө Александр Гармаев тэһэ баярлаа. «Энэ минии эгээл ехэ амжалта гээшэ. Иимэ холо ерэжэ, буряад угсаатанайнгаа һайхан нютагта шанда хүртэжэ байхада гоё ааб даа. Тиимэһээ саашада үшөө һайнаар хүдэлжэ, үшөөшье ехэ амжалта туйлаха һанаан ороодхино», — гээд Александр баяраараа хубаалдана.

Мүнгэн медальда хүртэгшэ Александрые найр нааданай оршон байдал ехэтэ гайхуулаа. «Эндэ ганса буряад хэлэн дээрэ хүн зоной хөөрэлдэхэ ямар һонин гээшэб. Би түрэл хэлэеэ хэды ойлгодогшье һаа, аягүй байдалда оло дахин орооб. Удаадахи „Алтарганын“ найрта заал һаа, буряад хэлэн дээрээ дуугарха гэжэ оролдохоб», — гэжэ залуу фотографай хэлэжэ байхада баярламаар.

Борис БАЛДАНОВ