РОКСАНА САНДАНОВА: МИНИИ АБА – ТҮРҮҮШЫМНИ БАГША

100 гаран хабаадагшад «Алтаргана-2014» һайндэрай арадай дуунай мүрысөөндэ хабаадаһаниинь гайхалгүй. Юуб гэхэдэ, манай буряад угсаатанда дуун гээшэмнай дээжын дээжэ ха юм, арадай сэдьхэл гээ һаа алдуу болохогүй. Буряадаймнай алтан гургалдай гэжэ нэрлэмээр залуу һүрэгэй нэгэ болохо Роксана Сандановагай алтан медальда хүртэхэдэнь урмашахамаар байгаа. Мүнөө Буряад ороноо суурхалһан алтан гургалдайтай манай сэтгүүлшэ Борис Балданов хөөрэлдэбэ:

— Энэ холо үнгэрһэн «Алтарганын» найр нааданда ерэжэ, алтан медаль абаһандаа ехэ баяртай байнаб. Үшөө Улаан-Үдэһөө ерэжэ ябахадаа бүхы харгыгаа «Алтаргана» хүрэтэрөө ехэ бэемни һалганан ябаа, ехэ айгааб. Теэд, эндэ түрүү һуурида гараха гэжэ зорижо ерэһэндээ, хуби заяанай хүбшэргөө байхадань, шалгарааб гэжэ һанагдана, — гээд абаһаар лэ Роксана мэдүүлнэ.

— Роксана, таанад сэбэр залуу басаган байнат. Харин хуушан арадай дуунуудые манай залуушуул ехээр хэрэглэнэгүй ха юм. Теэд, та яагаад арадай дуунда дурлаа гээшэбта?

— Багаһаам хойшо манай гэр бүлэдэ дуунай аялга наяржа байдаг гээшэ. Минии аба Ринчин-Доржо Мункоевич Сандановай ходо арадай дуу дуулажа ябахыень һанадагби. Тэрэ элдэб мүрысөөнүүдтэ, хүндэтэ айлшадые угтахадаашье арадайнгаа аялга татадаг һэн. Иигэжэ бии энээнэй үндэһэн дээрэ үндыһэн байнаб. Минии түрэл Яруунын таладал адли уудам дэлисэтэй арадай дуун намта дүтэрхы, бүхыгөөрөө тэрээние ехэ гоё удхатай, утын харгыдал һунасатай, мориной туруунай табараандал сууряатай гэжэ ходо һанадагби.

Түрэл Мужыхадаа дунда һургуули дүүргэмсээрээ Чайковскиин нэрэмжэтэ Улаан-Үдын хүгжэмэй училищи «Арадай дуун» гэһэн мэргэжэлдэ һурахаяа ороо һэм. Эндэ намай һургаһан, арадай дуунай шэнэ шэнжэнүүдтэй, таагдаагүй оньһотой танилсуулһан багша Ешин-Хорло Будуевна Гомбоинда доро дохин баяр хүргэжэ ябадагби.

Удаань Агын автомито тойрогой гүрэнэй үндэһэтэнэй «Амар сайн» гэһэн дуу хатарай театрта хүдэлжэ, аргагүй дүй дүршэлтэй болоо һэм. Харин мүнөө үедэ Зоригто болон Нонна Тогочиевтанай эстрадын театрта хүдэлжэ, наһанайнгаа жэмэлгэтэй болоод ябанаб.

— Иимэ үндэр хэмжээнэй «Алтаргана» найрта ямар дуу наяруулаабта?

— Би өөрөө ходо арадай дуунуудые шагнажа, эгээл гоеыень шэлэн абадаг заншалтайб. Мүрысөөнэй гуримаар хабаадагша бүхэн гурбан дуу хангюурдаха аргатай байгаа. Түрүүшын хоёр шатада һая сээжэлдэһэн арадай дуунуудые гүйсэдхөөб. Бусад дуушад мүн жюриин гэшүүд оло дахин энэ дуунуудые шагнаагүйһөө боложо, би уридшалан гарааб гэжэ һанагдана. Харин һүүлшын шатада өөрынгөө 5−6 жэл соо ходо хангюурдажа ябаһан дуугаа гүйсэдхэхэдэмни бэлэн байгаа.

— Буряадайнгаа нэрэ нэрлүүлэжэ ябахадатнай баярлаад, үшөө ехэ амжалтатай ябахыетнай хүсэнэб.

Борис БАЛДАНОВ хөөрэлдэбэ.

«Вконтакте» бүлгэм соохи зураг.